October 24, 2009

今日瞓醒嗰陣﹐已經係12點幾啦﹗

琴晚話早D瞓﹐咪又係攪到3點幾先瞓得﹗咁瞓到咁晏都好正常啫﹗只係D時間顛倒晒﹐唔正常啫﹗

瞓到咁晏﹐唔怪得瞓到條腰骨都痛啦﹗我條腰真係好犀利架﹗一開始痛﹐即係話我係時候醒﹐如果11點零都仲未起身﹐就會開始痛﹐一路痛到你醒為止﹐勁呢﹖所以最遲12點零1點就要落床架啦﹗

不過﹐起咗身之後﹐今日條腰骨又真係好咗D﹐冇琴晚咁痛啦﹗休息過係唔同D既﹗

可惜﹐而家又痛返呢﹗因為下晝見悶悶地﹐冇野做﹐又冇街出﹐(因為琴晚落雪﹐出面全部都係白晒﹐都下晝好晏先溶返晒﹐成地濕晒)﹐咁咪執下D野囉﹗將個房同雜物房D紙皮箱同大膠箱執黎執去﹐移黎移去﹐務求想將D野執好D﹐整返D空位出黎﹐順便可以將個晾衫架擺返出黎喺個雜物房到﹐可以攞黎掛D唔乾得既衫嘛﹗咁樣走黎走去﹐執下呢度執下嗰度﹐想唔“支力”﹐條腰骨唔痛﹐都唔得啦﹗

我仲要趁執野既時候﹐順手攞嘛仔仔D新/舊BB玩具同用品出黎﹐影嘛相添呀﹗擒高擒底﹐更加辛苦啦﹗

今日又影多咗幾張相﹐本來執房嗰陣﹐可以順手將D新衫都影嘛架﹗但係廢事一次過整咁多野呀﹗“支力”死我架嘛﹗邊頂得順喎﹗所以留返下次啦﹗反正﹐衫好容易攞出黎既啫﹗而且我都要開急﹐攞返幾件冬天衫出黎著﹐到時再慢慢揾衫出黎影相都唔遲﹗

以依家咁既進展﹐我稔下個星期﹐或者11月頭﹐已經可以開住個新BLOG先架啦﹗開咗之後﹐再慢慢POST上去﹐咁比人既感覺先會有新鮮感﹐同嘛知道我有更新個BLOG架嘛﹗因為我賣既所有野﹐都係自己既﹐全部都只會有一件。如果唔咁做﹐慢慢加D野落去﹐邊度會有人黎睇黎買呢﹗

希望成功啦﹗加油﹗

好啦﹗而家都2點半架啦﹗真係要瞓呢﹗我稔我聽日都仲要繼續執野﹐我想再執好D個櫃﹐咁可以將部舊電視搬返入黎嘛﹗